امانتیں ان کے حق داروں کو ادا کرو

امانتیں ان کے حق داروں کو ادا کرو

اللہ تعالیٰ فرماتے ہیں

إِنَّ اللَّهَ يَأْمُرُكُمْ أَنْ تُؤَدُّوا الْأَمَانَاتِ إِلَى أَهْلِهَا وَإِذَا حَكَمْتُمْ بَيْنَ النَّاسِ أَنْ تَحْكُمُوا بِالْعَدْلِ إِنَّ اللَّهَ نِعِمَّا يَعِظُكُمْ بِهِ إِنَّ اللَّهَ كَانَ سَمِيعًا بَصِيرًا [النساء : 58]

بے شک اللہ تمھیں حکم دیتا ہے کہ تم امانتیں ان کے حق داروں کو ادا کرو اور جب لوگوں کے درمیان فیصلہ کرو تو انصاف سے فیصلہ کرو، یقینا اللہ تمھیں یہ بہت ہی اچھی نصیحت کرتا ہے۔ بے شک اللہ ہمیشہ سے سب کچھ سننے والا، سب کچھ دیکھنے والا ہے۔

اور فرماتے ہیں

فَلْيُؤَدِّ الَّذِي اؤْتُمِنَ أَمَانَتَهُ [البقرة : 283]

تو جس پر اعتبار کیا گیا ہے وہ اپنی امانت ادا کرے

امانتوں کی پاسداری، کامیاب مومنین کا وصف ہے

فرمایا :

وَالَّذِينَ هُمْ لِأَمَانَاتِهِمْ وَعَهْدِهِمْ رَاعُونَ [المؤمنون : 8]

اور وہی جو اپنی امانتوں اور اپنے عہد کا لحاظ رکھنے والے ہیں۔

ایک قلم کی امانت

"عبدالله ابن مبارک(رحمه اللّٰه) نے شام میں ایک شخص سے قلم مستعار لیا ۔ واپس لوٹانا بھول گئے اور واپسی کا سفر شروع کر دیا ۔ "مرو” پہنچے تو یاد آیا کہ قلم لوٹانا بھول چکا ہوں ۔ وہیں سے واپس ہو لئے(تقریبا 1881 کلومیٹر) اور شام جا کر قلم لوٹایا ۔” (سیر اعلام النبلاء للذھبي رحمه اللّٰه : ٣٧٤/٧)

امانت پہچانے کی حیرت انگیز کوشش

ابوہریرہ رضی اللہ عنہ سے ‘ انہوں نے نبی کریم صلی اللہ علیہ وسلم سے کہ بنی اسرائیل میں ایک شخص تھا جس نے دوسرے بنی اسرائیل کے شخص سے ہزار اشرفیاں قرض مانگیں۔ اس نے اللہ کے بھروسے پر اس کو دے دیں۔ اب جس نے قرض لیا تھا وہ سمندر پر گیا کہ سوار ہوجائے اور قرض خواہ کا قرض ادا کرے لیکن سواری نہ ملی۔ آخر اس نے قرض خواہ تک پہنچنے سے ناامید ہوکر ایک لکڑی لی اس کو کریدا اور ہزار اشرفیاں اس میں بھر کروہ لکڑی سمندر میں پھینک دی۔ اتفاق سے قرض خواہ کام کاج کو باہر نکلا ‘ سمندر پر پہنچا تو ایک لکڑی دیکھی اور اس کو گھر میں جلانے کے خیال سے لے آیا۔ پھر پوری حدیث بیان کی۔ جب لکڑی کو چیرا تو اس میں اشرفیاں پائیں [بخاري كِتَابُ الزَّكَاةِ، 1498]

امانت داری کی انتہا دیکھیں کہ کوئی سونا لینے کو تیار نہیں

ابوہریرہ رضی اللہ عنہ نےبیان کیا کہ رسول اللہ ﷺ نےفرمایا ، ایک شخص نےدوسرے شخص سےمکان خریدا اورمکان کےخریدار کواس مکان میں ایک گھڑا ملا جس میں سونا تھا جس سےوہ مکان اس نےخریدا تھا، اس سے اس نے کہا :

خُذْ ذَهَبَكَ مِنِّي إِنَّمَا اشْتَرَيْتُ مِنْكَ الْأَرْضَ وَلَمْ أَبْتَعْ مِنْكَ الذَّهَبَ

بھائی گھڑا لےجاؤ۔ کیونکہ میں نےتم سے گھر خریدا ہےسونا نہیں خریدا تھا

لیکن پہلے مالک نےکہا :

إِنَّمَا بِعْتُكَ الْأَرْضَ وَمَا فِيهَا [بخاری، كِتَابُ أَحَادِيثِ الأَنْبِيَاءِ : 3472]

کہ میں نےگھر کوان تمام چیزوں سمیت تمہیں بیچ دیا تھا جواس کے اندر موجودہوں ۔

یہ دونوں ایک تیسرے شخص کےپاس اپنامقدمہ لےگئے ۔ فیصلہ کرنےوالے نےان سےپوچھا کیا تمہارے کوئی اولاد ہے؟ اس پر ایک نے کہاکہ میرا ایک لڑکا ہے اوردوسرے نےکہا میری ایک لڑکی ہے۔فیصلہ کرنے والے نےان سے کہا کہ لڑکے کا لڑکی سےنکاح کردو سونا انہیں پرخرچ کردو اورخیرات بھی کردو

ابو زید اعجاز شہید رحمہ اللہ کی امانت داری

ہمارا ایک بھائی مقبوضہ وادی میں غاصب فوج کے خلاف لڑتا ہوا شہید ہوگیا اللہ تعالیٰ بھائی کی شہادت قبول فرمائے ابو زید اعجاز شہید رحمہ اللہ ان کا نام تھا ایک دفعہ سفر میں تھے گاڑی میں سوار ہوئے جہاں پہنچنا تھا وہاں تک جتنا کرایہ بنتا تھا اس سے کم پیسے جیب میں تھے تو جب اتنا سفر طے کر لیا کہ جتنے پیسے جیب میں تھے تو نیچے اتر گئے اور باقی ماندہ 5، 7 کلومیٹر سفر پیدل طے کیا

بھائیوں نے پوچھا کہ ایسا کیوں کیا ہے اگلا 5، 7 کلومیٹر سفر رہ گیا تھا گاڑی والوں سے بات کرلیتا تو انہوں نے ویسے ہی مان جانا تھا

کہنے لگے جتنے پیسے تھے اتنا سفر کرلیا تھا مزید سفر کرکے گاڑی کے مالک کے مال میں خیانت نہیں کرسکتا تھا

جو آپ سے خیانت کرے، آپ اس کے ساتھ بھی امانت داری کریں

سیدنا ابوہریرہ ؓ سے روایت ہے کہ رسول اللہ ﷺ نے فرمایا

أَدِّ الْأَمَانَةَ إِلَى مَنْ ائْتَمَنَكَ وَلَا تَخُنْ مَنْ خَانَكَ [ابوداؤد ،کِتَابُ الْإِجَارَةِ :3535]

” جو تجھے امین بنائے ، تو اس کی امانت اسے ادا کر دے اور جو تیری خیانت کرے ، تو اس کی خیانت نہ کر ۔ “

امام احمد اور حاکم وقت سے امانت داری کی اعلیٰ مثال

ابو عبداللہ السلمی، امام احمد بن حنبل رحمہ اللہ کے بارے لکھتے ہیں کہ انہیں عمارہ بن حمزہ کے گھر نظر بند کردیا گیا تو گھر والوں نے بیڑیاں کھلی ہونے کی وجہ سے ان کے پاؤں سے اتار دیں اور لوگوں نے امام صاحب سے کہا کہ نکل جاؤ، کہیں گم، چھپ جاؤ

کہنے لگے اگر ہمیں بیڑیوں کے بغیر ہی قید کیا ہوتا تو بھی ہم حاکم کی اجازت کے بغیر نہ نکلتے

(السنہ لعبد اللہ بن أحمد بن حنبل رحمہ اللہ )

انبیاء کرام علیہم السلام اور امانت داری

امانت داری کا وصف تمام انبیاء کرام علیہم السلام کی سیرت میں نمایاں نظر آتا ہے

خدیجہ رضی اللہ عنھا کا مال اور نبی کریم صلی اللہ علیہ وسلم کی امانت و دیانت

جس طرح آج ہمارے خدمت والے بھائی، لوگوں کا مال لے کر متاثرہ علاقوں کی طرف جا رہے ہیں

اسی طرح

نبی کریم صلی اللہ علیہ وسلم،خدیجہ رضی اللہ عنھا کا مال لے کر تجارت کی غرض سے نکلے تو ایسی شاندار امانت و دیانت کا مظاہرہ کیا کہ

خدیجہ رضی اللہ عنھا سے شادی کا سبب بن گیا

خدیجہ رضی اللہ عنھا نے نبی کریم صلی اللہ علیہ وسلم کے اس مثالی کردار سے متاثر ہو کر پیغام بھیجا اور فرمایا :

انی قد رغبت فیک لقرابتک وسطتک فی قومک وامانتک وحسن خلقک وصدق حدیثک

[ابن ھشام 189/1]

مجھے چند باتوں کی وجہ سے آپ سے (نکاح میں) رغبت ہے

1 اس لیے کہ آپ ہمارے رشتہ دار ہیں

2 اور آپ اپنی قوم میں ایک نمایاں مقام رکھتے ہیں

3 اور آپ امانت دار ہیں

4 اور آپ کا اخلاق بہت اچھا ہے

5 اور آپ سچ بات کہتے ہیں

قاتلوں کی امانتوں کی فکر

نبی کریم صلی اللہ علیہ وسلم ایسے امانت دار تھے کہ مکے کے لوگ آپ کو صادق و امین کہا کرتے تھے

اور جس رات آپ نے ہجرت کی، اس رات حالت یہ تھی کہ جن لوگوں نے گھر سے باہر آپ کے گھر کو چاروں طرف سے گھیر رکھا تھا اور آپ کو شہید کرنے کا پکا پروگرام بنائے بیٹھے تھے، آپ گھر کے اندر انہی لوگوں کی امانتوں کے بارے پریشان ہورہے تھے وہ واپس کیسے کرنی ہیں

بالآخر ساری امانتیں علی رضی اللہ عنہ کو پکڑا کر اور ان کے مالکوں تک واپس کرنے کی ڈیوٹی لگا کر خود ہجرت کی راہوں پہ چل نکلے (السیرۃ النبویہ لابن ھشام 485/1)

ہرقل کے سامنے ابوسفیان رضی اللہ عنہ کی گواہی

ابوسفیان رضی اللہ عنہ کہتے ہیں کہ ہرقل نے مجھے پوچھا تھا کہ وہ ( محمد صلی اللہ علیہ وسلم ) تمہیں کس بات کا حکم دیتے ہیں، جب میں نے وہ باتیں بتائیں تو کہنے لگا :

فَزَعَمْتَ: «أَنَّهُ أَمَرَكُمْ بِالصَّلاَةِ، وَالصِّدْقِ، وَالعَفَافِ، وَالوَفَاءِ بِالعَهْدِ، وَأَدَاءِ الأَمَانَةِ»، قَالَ: وَهَذِهِ صِفَةُ نَبِيٍّ [بخاری ،كِتَابُ الشَّهَادَاتِ: 2681]

تم نے بتایا کہ وہ تمہیں نماز ، سچائی ، عفت ، عہد کے پورا کرنے اور امانت کے ادا کرنے کا حکم دیتے ہیں ۔ تو (سن لو کہ) یہ نبی کی صفات ہیں

صدقے کی ایک کھجور اور نبی کریم صلی اللہ علیہ وسلم کی امانت داری

خدمت کمیٹیوں والے بھائی راشن پیک تیار کرتے وقت اس حدیث کو ضرور سامنے رکھیں

ابو ہریرہ رضی اللہ تعالیٰ عنہ بیان کرتے ہیں کہ رسول اللہ صلی اللہ علیہ وسلم نے فرمایا :

إِنِّي لَأَنْقَلِبُ إِلَى أَهْلِي فَأَجِدُ التَّمْرَةَ سَاقِطَةً عَلَى فِرَاشِي ثُمَّ أَرْفَعُهَا لِآكُلَهَا ثُمَّ أَخْشَى أَنْ تَكُونَ صَدَقَةً فَأُلْقِيهَا [مسلم’ كِتَابُ الزَّكَاةِ :2476]

میں اپنے گھر لوٹتا ہوں اور اپنے بستر پر ایک کھجور گری ہو ئی پا تا ہوں میں اسے کھا نے کے لیے اٹھا تا ہوں پھر ڈرتا ہوں کہ یہ صدقہ نہ ہو تو اسے پھینک دیتا ہوں

نوح علیہ السلام کی امانت داری

إِذْ قَالَ لَهُمْ أَخُوهُمْ نُوحٌ أَلَا تَتَّقُونَ [الشعراء : 106]

جب ان سے ان کے بھائی نوح نے کہا کیا تم ڈرتے نہیں؟

إِنِّي لَكُمْ رَسُولٌ أَمِينٌ [الشعراء : 107]